Textus Originalis

I DOCUMENTI INEDITI

Willelmi Dei gratia magnificentissimi et gloriosissimi regis Sicilie ducatus Apulie et principatus Capue anno quarto feliciter, amen. Tustanus (a) dei gratia mazariensis episcopus humilis et indignus. Episcopali officii consideratione monemur, novis monasteriis de temporalium rerum facultatibus nobis a Domino concessis misericorditer providere, et pietatis porrigere dexteram sanctis et venerabilibus locis, ut personis ad laudem Dei, et ad magnificentiam Divini cultus congregatis non desint subsidia temporalium, quarum meriti in eterna tabernacula recipi et confidimus et speramus. Note siquidem veritatis est, virum spectabilem et illustrem dominum Mattheum domini regis vicecancellarium propriis sumptibus edificasse Monasterium titulo sancte Marie de Latinis intra muros Panormitane civitatis, a Domino imperpetuum conservande, in qua religiosum collegium sanctimonialium collocavit, et quoddam Casale nomine Corubrichi imperpetuum eidem loco venerabili, religiosa liberalitate obtulit et concessit. Quod Casale quoniam infra ambitum Parrochie nobis a Domino commisse continetur, unde ex eo decimationem annuam de jure ecclesiastico recipere solebamus; nos pietatis obtentu et misericordie consideratione eamdem decimationem consensu fratrum et canonicorum nostrorum illi sanctarum virginum collegio predicto, videlicet Monasterio Sancte Marie de Latinis, remittimus et imperpetuum concedimus offerimus et donamus. Ut autem illi loco venerabili hec oblatio perpetua possit firmitate constare, nec aliquo iure, cognita possit ratione revocari, prebende ad quam predicta decimatio pertinebat, duo predia loco recompensationis aggregamus, que nuper sumptibus nostris a domino Willelmo filio Henrici Tironi comparavimus: quorum alterum est arboribus consitum et parietibus circumdatum, alterum vero via publica interposta terra laboratoria ad seminandum idonea, nec longe a civitate Mazarie, a Domino in perpetuum conservande. Addicimus etiam eidem prebende decimationem cuiusdam casalis nomine Kariani, quam nostris temporibus multo labore et sudore Mazariensi ecclesie acquisivimus. Hec omnia supradicta, predicte Mazariensi ecclesie nostris temporibus acquisita, prebendarium de Kala-